په هلمند ولایت کې د لوی مانده لومړنی ښوونځی ګټې اخیستنې ته وسپارل شو
د یونیسف د سیمه ییز دفتر په مالي ملاتړ او په هلمند ولایت کې د LKRO مؤسسې په مرسته د نادعلي ولسوالۍ د لوی مانده ښوونځی جوړ او ګټې اخیستنې ته وسپارل شو.
د دې ښوونځي په بیارغونه کې ټولټال یو میلیون او ۸۰ زره افغانۍ لګښت راغلی چې د جوړېدو چارې یې د بست شرکت له لوري د دریو میاشتو په موده کې بشپړې شوې.
په همدې مناسبت یوه غونډه جوړه شوې وه، چې د پوهنې ریاست مشرتابه او مسئولینو، د سیمه ییزو ادارو استازو، علماوو او د نادعلي د سیمې خلکو برخه اخیستې وه.
د هلمند د پوهنې ریاست مشرتابه له مرستندویو ادارو څخه د مننې ترڅنګ له مسئولینو، ښوونکو او د منځني ښوونځي له زده کوونکو وغوښتل چې د ښوونځي ساتنې ته پام وکړي او له والدینو یې وغوښتل چې خپل ماشومان ښوونځیو او مدارسو ته واستوي.
د يادونې وړ ده، چې د پوهنې په برخه کې مرستندویو ادارو په هلمند ولايت کې د شاوخوا ٥٠ ښوونځيو د بيارغونې چارې بشپړې کړي او د ٤٥ نورو ښوونځيو د بيارغونې چارې روانې دي.
