په لغمان ولایت کې د راستنېدونکو کډوالو ماشومان ښوونځیو ته جذبېږي
د لغمان ولایت پوهنې ریاست له لوري ملک ته د راستنېدونکو کډوالو له ډلې د ۱۲۵ تنو ماشومانو د ښوونیزې کچې د تثبیت په موخه، له اووم تر دولسم ټولګي پورې د شاملېدو ازموینه واخیستل شوه.
د یادې ازموینې موخه د راستنېدونکو ماشومانو د ښوونیزې کچې معلومول او د هغوی د زدهکړو له سویې سره سم په مناسبو ټولګیو کې شاملول دي.
د پوهنې مسوولینو د ازموینې ګډونوالو ماشومانو ته د ډاډ ورکولو ترڅنګ وویل: «تاسو نور کډوال او بېځایه شوي نه یاست؛ تاسو د دې ملک د وجود یوه برخه یاست او په خپل وطن کې د خپل کور خاوندان یاست. تاسو بختور یاست چې په خپل وطن کې د زدهکړې اسانتیاوې لرئ.»
د پوهنې مسوولینو زیاته کړه، راستنېدونکو ماشومانو ته د زدهکړو د دوام زمینه برابرول د هغوی د راتلونکي د روښانتیا ترڅنګ، د هېواد د علمي او بشري ظرفیتونو په پیاوړتیا کې هم مهم رول لري.
