په سرپل ولایت کې د ۱۰ مېلیونه افغانیو په لګښت د یوې دیني مدرسې رغنیزې چارې پیل شوې
د سرپل ولایت ګوسفندي ولسوالۍ اړوند د مرکزي دارالعلوم ودانیزې چارې، د یاد ولایت پوهنې چارواکو له خوا په رسمي ډول پیل شوې.
دغه تعلیمي پروژه چې د یاد ولایت معارف دوسته خلکو په مالي ملاتړ سره د شاوخوا ۱۰ مېلیونه افغانیو په لګښت سره د ۴.۵ جرېبه ځمکې په ساحه کې په درې پوړیز ډول پلي کېږي، ۱۲۰ درسي خونې، یو محراب جومات، خوړنځی او نور اړین محلقات پکې شامل دي.
د سرپل ولایت پوهنې رئیس محترم مولوي محمد رحماني په خپله وینا کې د ګوسفندي ولسوالۍ له خلکو څخه د دغې لویې پروژې په تمویل کې د فعالې ونډې اخیستنې له امله د مننې ترڅنګ ټینګار وکړ چې دوی باید د مدارسو او ښوونځیو د ساتنې، تجهیز او لا پراختیا لپاره له پوهنې وزارت سره خپلو همکاریو ته دوام ورکړي.
د پوهنې وزارت مشرتابه، د هېواد د پوهنې مینه والو له مادي او معنوي ملاتړ ستاینه کوي او د هېواد په کچه د ښوونې او روزنې کیفیت لالوړولو ته خپل ځان ژمن ګڼي.
