په سرپل ولایت کې د یو شمېر مدارسو او ښوونځیو بیارغونې چارې پیل شوې
د سرپل ولایت پوهنې رئیس مولوي محمد رحماني په وینا: په یاد ولایت کې د ۱۲ بابه ښوونځیو او ۲ بابه مدارسو د بیارغونې چارې پیل شوې، چې ټولټال ۸ مېلیونه ۳۰۰ زره ۸۶۰ افغانۍ لګښت پرې راځي او ټاکل شوې ده، چې د پوهنې وزارت له بودیجې څخه تمویل شي.
نوموړي زياته کړه، چې د يادو پرژو له جملې څخه د ۱۴ بابه ښوونځيو د بيارغونې چارې بشپړې شوې او ډېر ژر به د زده کوونکو پرمخ ګټې اخيستنې ته وسپارل شي.
همدارنګه د پوهنې رئیس وويل، له پوهنې سره يو شمېر همکارو بنسټونو ژمنه کړې، چې په دغه ولايت کې به يو شمېر مدارس او ښوونځي بېرته ورغوي.
د همدغه مدارسو او ښوونځيو مسئولينو او زده کوونکو د خپلو ښوونیزو بنسټونو د بيارغونې له امله خوښي څرګنده کړه او په دې برخه کې يې د پوهنې وزارت د مشرتابه له پاملرنې څخه مننه او قدرداني وکړه.
