په جوزجان ولايت کې د يو باب ښوونځي نوې ودانۍ پرانیستل شوه
د جوزجان ولایت شبرغان ښار اړوند په یماق تنکه کلي کې د یو باب ښوونځي نوې ودانۍ، د پوهنې رئیس الحاج مولوي محمد طاهر جواد، مسئولینو، د یاد ولایت د والي قاري ګل حیدر شفق او یو شمېر علماوو په حضور کې ګټې اخیستنې ته وسپارل شوه.
د یاد ولايت پوهنې رئيس د معلوماتو له مخې، دغه ښوونځى د یو تن علم پروره شخصیت په مالي ملاتړ، د ٢٥ زره امريکايي ډالرو په ارزښت جوړ شوى، چې ۸ درسي، ۲ اداري خونې لري او په یو وخت کې د ٤٠٠ تنو زده کوونکو ظرفيت لري.
د سيمې اوسېدونکو د ياد ښوونځي له جوړېدو څخه خوښي څرګنده کړه او د پوهنې په برخه کې يې د خپلو مادي او معنوي مرستو ډاډ ورکړ.
د پوهنې وزارت مشرتابه له پوهنیزنظام سره د خلکو د دوامداره ملاتړ له امله مننه کوي او له ملي سوداګرو څخه غواړي چې د دغه وزارت د پوهنې د پراختیا په برخه کې همکاري وکړي.
