په ارزګان ولایت کې ۱۳ ښوونځي جوړېږي
د ارزګان ولایت د پوهنې ریاست او د یونیسف مؤسسې د ترسره شوي هوکړه لیک پر اساس، یونیسف مؤسسه په پام کې لري، چې د ارزګان ولایت په مرکز او ولسوالیو کې ۱۳ ښوونځي جوړ کړي.
د یادې مؤسسې په وینا؛ په پام کې ده، چې دا ښوونځي په معیاري او اساسي ډول د ټولو امکاناتو په لرلو سره جوړ شي.
د ارزګان ولایت د پوهنې رئیس الحاج مولوي شمس الله کامران آخندزاده د یادې مؤسسې له هڅو او مرستو څخه ستاینه وکړه او زیاته یې کړه، چې د دې ودانیو په رغولو سره به د دې ولایت د زرګونو زده کوونکو ستونزې تر ډېره بریده حل شي.
د یادې مؤسسې د مسئولینو په وینا: د دې ښوونځیو د جوړولو چارې به په دې نږدې ورځو کې پیل شي.
