له ولایتونو څخه د پوهنې لنډ خبرونه
پروان
د پروان ولایت، د لغماني صوفیان دارالحفاظ د قرآن عظیم الشان د حافظانو فراغت غونډه، د یاد ولایت د پوهنې رئیس، استادانو، طالب العلمانو، دیني علماوو او مشرانو په ګډون د یو لړ شانداره مراسمو په ترڅ کې ترسره شوه.
د پروان پوهنې رئيس مفتي محمد حسن حقاني او نورو ويناوالو فارغانو ته د مبارکۍ ورکولو پر مهال، د قرانکريم د حفظ پر عظمت او په ټولنه کې د حافظانو د مقام په اړه خبرې وکړې او هغوی ته يې د خپلو مسئوليتونو په اړه معلومات ورکړل.
نورستان
د نورستان ولایت پوهنې رئیس مولوي تاج محمد مطئمن په یاد ولایت کې د یونیسف د ساحوي دفتر او "ابرار" مؤسسې له استازو سره وکتل.
په دې کتنه کې دواړو لورو د یاد ولایت په لرو پرتو سیمو کې د ښوونیزو کړنو، د پوهنې د ستونزو څېړلو، د کاري همغږۍ د رامنځته کولو او د پوهنې د پراختیا په اړه بحث او لازم تصمیمونه ونیول.
دایکنډي
د دايکنډي ولايت پوهنې رئيس قاري عنايت الله سهار په یاد ولايت کې د "آرسو" مؤسسې ساحوي مدير انجنير نبيل سره وکتل او د ښوونځيو د ترميم د پروژې د پيل او نورو ښوونيزو خدمتونو په اړه يې تفصیلي خبرې وکړې.
غزني
د غزني ولایت پوهنې رئیس الحاج مولوي میر نصیر احمد حسیني، د یاد ولایت د استخباراتو له اداري مرستیال سره وکتل او د پوهنې د پروګرامونو د پلي کېدو په برخه کې یې د لا زیاتې کاري همغږۍ په اړه خبرې وکړې.
لغمان
د لغمان ولایت پوهنې رئیس مولوي شاه جهان ساجد او ورسره مل پلاوي د یاد ولایت الیشنګ ولسوالۍ د یو شمېر ښوونځیو او مدارسو څخه څارنه وکړه او مسئولینو ته یې د کړنو د لاښه والي په موخه لازمې لارښوونې او سپارښتنې وکړې.
