له ولایتونو څخه د پوهنې لنډ خبرونه
بلخ
د بلخ ولایت د پوهنې ریاست مشرتابه د هېواد د تکړه عالمانو تر لارښوونې لاندې د بلخ او سمنګان ولایتونو د مدارسو د حدیثو د دورې د ۵۱ تنو فاضلانو ترمنځ د مقالې لیکلو سیالي جوړه کړه. د دې ولايت د پوهنې رئيس مولوي عبدالجليل شهیدخېل له ګډونوالو وغوښتل، چې د نبوي سنتو له مخې دې په ښه شکل په ازموينه کې ګډون وکړي.
له بلخ څخه په يو بل خبر کې راغلي، چې د پوهنې وزارت د زده کوونکو د چارو ریاست له خوا د بلخ ولايت ښاري ښوونځيو او د ولسواليو او د پوهنې د آمرینو لپاره د پلان جوړونې د فعاليتونو د عملي کولو تر سرليک لاندې درې ورځنى لارښود سيمينار جوړ شوی و پای ته ورسید.
د دې ولایت د پوهنې رئیس الحاج مولوي عبدالجلیل شهیدخېل د غونډې له ګډونوالو وغوښتل، چې په دفترونو او خپلو اړوندو ساحو کې د دغې سیمینار له مطالب څخه ګټه پورته کړي.
کندز
د کندز ولایت د پوهنې سرپرست مولوي غلام رسول حقاني په افغانستان کې د یونیسف ادارې له مرستیال ښاغلي شامي سره د یوې غونډې په ترڅ کې د ۱۵ ښوونځیو د ودانیو د بیارغولو په باب خبرې وکړې. ښاغلي شامي ژمنه وکړه چې د دغو ښوونځیو د بیارغوني په پار به جدي اقدام وکړي.
نیمروز
د نیمروز ولایت د پوهنې ریاست د عمومي زده کړو آمر مولوي ګلبدین شریفي د پوهنې وزارت د زده کوونکو چارو ریاست د پلانونو د عملي کولو د لارو چارو د لارښوونې له علمي سیمینار څخه لیدنه او څارنه وکړه او د یاد ریاست په تړاو یې د پوهنې وزارت د پلان شویو فعالیتونو د تطبیق په باب لارښوونې وکړې.
خوست
د خوست د مرکز او ولسوالیو د ښوونځیو د آمرینو او مدیرانو لپاره د پوهنې وزارت د روغتیا ریاست له خوا د ښوونځیو او پوهنې ریاستونو د حفظ الصحې په باب د پوهاوي سیمینار پای ته ورسېد.
