له ولایتونو څخه د پوهنې خبرونه
سرپل
د سرپل ولایت د پوهنې رئیس مولوي محمد رحماني د مرکزي دارالعلوم او امام زاده یحیی د درسونو په پرانېست غونډه کې د ګډون په ترڅ کې د عصري او دیني علومو زده کړې ته د زده کوونکو د هڅولو ترڅنګ د علم او پوهې پر ارزښت خبرې وکړې.
نیمروز
د نیمروز ولایت د پوهنې رئیس الحاج مولوي ګل احمد حقاني او ورسره مل پلاوي د ښوونیزو خدمتونو د وضعیت د ارزونې په موخه د زرنج ښار د فروخي هلکانو ښوونځي څخه یې لیدنه وکړه.
د يادونې وړ ده، چې د ياد ښوونځي د زده كوونكو والدينو د دې ښوونځي د كتابتون لپاره ۵۰۰ ټوکه درسي كتابونه مرسته وكړه، چې د پوهنې رياست مشرتابه له دوی څخه مننه وكړه.
لغمان
د لغمان ولایت د زرکمر لېسې ادارې د دغه ولایت د زرکمر کلي له علماوو، قومي مخورو او اوسېدونکو سره مشورتي ناسته وکړه او د لېسې د نویو زده کوونکو د جذولو او د شته ستونزو د هواري په برخه کې یې له هغوی څخه د مشورو او مرستو غوښتنه وکړه.
بلخ
د بلخ ولایت د شورتپې ولسوالۍ د پوهنې آمریت اداري غونډه ترسره شوه چې د یونسکو د سیمه ییز دفتر تر څارنې لاندې د سیمه ییزو او چټکو زده کړو ټولګیو د اداري، تدریسي او یو لړ ستونزو په باب خبرې وشوې.
بلخ
د بلخ ولایت د پوهنې ریاست د تعلیمي څارنې کارکوونکو د مزارشریف ښار او د البرز، کوهي او مارمل ولسوالیو د یو شمېر ښوونځیو، دیني مدارسو، د سواد زدهکړو له سیمهییزو ټولګیو له ښوونیز بهیر څخه څارنه وکړه. او د یادو ادارو له مدیرانو او استادانو سره یې د ښوونیزو چارو د ښه والي په باب خبرې وکړې.
