له ولایتونو څخه د پوهنې اړوند څو لنډ خبرونه
هرات
د هرات ولایت د پوهنې يوه دوست شخصيت الحاج محمد داوود سروري، د ياد ولایت د شهدا منځني ښوونځي ادارې ته ۱۰۰ مېزونه او څوکۍ د یوې غونډې په ترڅ کې چې د پوهنې ریاست رئیس او مسئولینو پکې ګډون درلود، وسپارلې.
د هرات ولايت پوهنې رئيس له دغه علم دوست هېوادوال څخه د مننې تر څنګ، له نورو شخصيتونو او خيريه بنسټونو وغوښتل، چې د پوهنې د لا پياوړتيا په موخه دې له دغه رياست سره همکاري وکړي.
ننګرهار
د ننګرهار ولایت پوهنې ریاست د ۱۴۰۲ کال د کانکور آزموینې پروسې د ښه تطبيق په موخه، د ياد ولایت د ۲۲ ولسوالیو پوهنې له آمرانو او د لوړو زده کړو وزارت له پلاوي سره د همغږۍ غونډه وکړه.
ټاکل شوې د ننګرهار ولایت د کانکور آزموینه د روان لمريز کال، د زمري میاشتې په ۱۲، ۱۳ او ۱۴ نېټو، په دریو پړاونو کې واخیستل شي.
غزني
د غزني ولایت پوهنې رئیس الحاج مولوي میرنصیر احمد حسیني د ياد ولایت مرکز او ولسوالیو د پوهنې له آمرانو سره وکتل.
د پوهنې رئيس په دې کتنه کې د قانوني اجراآتو، د پوهنې ریاست ادارو ترمنځ د همغږۍ، پوهنې ریاست د نوي تشکيلاتي جوړښت د تطبيق، ګمارنې او بدلونونو، او له بيت المال څخه د ساتنې په برخو کې تفصيلي خبرې او لارښوونې وکړې.
د يو بل خبر له مخې
د لوړو زده کړو وزارت يو پلاوي د کانکور آزموينې د ښه تطبيق په موخه، غزني ولايت ته سفر کړی او د ياد ولايت د مرکز او ولسواليو پوهنې مسئولينو ته يې د نوماندانو سره د ښه چلند ، دآزموينې د پروسې اصول او مقررات ور وښودل، ترڅو د يادې آزموينې بهير په برياليتوب سره ترسره شي.
سرپل
د سرپل ولایت پوهنې رياست د دیني مدارسو د تشو بستونو ډکولو لپاره، له ۴۱ تنو څخه، چې په پام کې ده د مدارسو لپاره داستادانو په توګه وګمارل شي؛ رقابتي آزموینه واخیسته.
ټاکل شوې ده د نوماندانو له ډلې ۱۰ تنه هغه کسان چې د معیاري نمرو په ترلاسه کولو بریالي شي، د ياد ولایت په مدارسو کې د استادانو په توګه وګمارل شي.
د سرپل ولايت پوهنې رئيس مولوي محمد رحماني د يادې آزموينې د څارنې تر څنګ، نوماندانو ته په آزموينه کې د شفافيت او روڼتيا ډاډ ورکړ.
