له مرکز او ولایتونو د پوهنې لنډ خبرونه
کابل ښار
د کابل ښار پوهنې ریاست له پاکستان څخه د راستنو شویو کډوالو زده کوونکو څخه په ښوونځیو کې د هغوی د شاملولو په موخه د سویې د تثبیت ډله ییزه آزموینه واخیسته.
د پوهنې رئيس قاري عبدالباسط حقاني له يادې آزموينې څخه ليدنه وکړه او د هېواد بچيانو لپاره يې د زده کړو آسانتیاوو پر برابرولو ټينګار وکړ.
هرات
د هرات ولایت مرکز، انجیل او ګذرې ولسوالیو د دیني مدارسو د اداري او تدریسي لارښود غونډه، د یاد ولایت پوهنې رئیس مولوي رحمت الله جابر تر څارنې لاندې جوړه شوې وه.
د یادې غونډې په ترڅ کې د ښوونې او روزنې د پرمختګ د څرنګوالي په ګډون په بېلابېلو موضوعاتو لکه: د دیني مدارسو اداري چارې، تدریسي چارې، د ښوونځیو په جوړولو او د ښوونکو په ګمارلو کې د آسانتیاوو رامنځته کولو په تړاو تفصیلي خبرې وشوې.
هلمند
د هلمند ولايت پوهنې رئيس الحاج مولوي محمد عوض انصاري د ياد ریاست له آمرینو او مديرانو سره د ليدنې پر مهال له هغوی وغوښتل، تر څو د مراجعينو د کارونو د آسانه کولو په موخه دې په خپلو ورځنيو چارو کې صادقانه چلند وکړي.
کندوز
دکندوز ولایت پوهنې ریاست اوونیزه اداري غونډه، د یاد ولایت پوهنې رئیس الحاج مولوي محمد اسماعیل ابو احمد په مشرۍ ترسره شوه.
په یاده غونډه کې د حاضرۍ پر پابندۍ د ټینګار تر څنګ، په ښوونځیو کې د قوانینو د پلي کولو او د درسونو د کیفیت په اړه خبرې وشوې.
