د یو شمېر ولایتونو پوهنې آمرینو ته ۴ ورځنی علمي سیمینار پرانیستل شو
د پوهنې وزارت د تشکیلاتو ریاست له لوري د خوست، پنجشېر، لوګر، کونړ، غزني، فراه، میدان وردګ، زابل او پروان ولایتونو د پوهنې آمرینو رهبري او مدیریتي وړتیاوو لوړولو په موخه علمي سیمینار، د یاد وزارت د ښوونې او روزنې معین الحاج مولوي سخاءالله سعید، د کیفیت تضمین معین الحاج مولوي عبدالخالق صادق، د سرچینو او ادارې معین الحاج مولوي صبغت الله وصیل، ځینو مرکزي رئیسانو، مسئولینو او علماء کرامو په حضور کې جوړ شو.
په پیل کې د پوهنې وزارت د تشکیلاتو رئیس مفتي عبدالحلیم حلیمي لوړ پوړو مېلمنو او ګډون والو ته د ښه راغلاست ترڅنګ، د یاد سیمینار د بنسټیزو موخو او اهمیت په تړاو تفصیلي ویناء وکړه او ویې ویل چې په یاد سیمینار کې به د یو شمېر ولایتونو ۱۰۶ تنو پوهنې آمرینو ته د میتودیکي او رهبري وړتیاوو لوړولو په تړاو معلومات ارایه شي.
ورپسې د یاد وزارت د ښوونې او روزنې معین، دغه ډول سیمینارونه د پوهنې منسوبینو لپاره خورا اغېزناک وبلل او له ګډون والو یې وغوښتل چې د یادو علمي پروګرامونو له منځپانګې اعظمي ګټه پورته کړي.
همدارنګه د پوهنې وزارت د کیفیت تضمین معین په هېواد کې روان سرتاسري امنیت ته په اشارې سره وویل: اوس د دې وخت رارسېدلی دی چې په بشپړ امنیت او ډاډ سره خپلې دندې په آرامه فضا کې ترسره کړو.
نوموړي په خپلو خبرو کې زیاته کړه، چې پوهنې وزارت د راتلونکو نسلونو د باکیفیته ښوونې او روزنې برخه کې شپه ورځ هڅې کوي.
په ورته وخت کې د پوهنې وزارت د سرچینو او ادارې معین په خپلو خبرو کې څرګنده کړه، اوسمهال د یاد وزارت مشرتابه د پوهنیز کیفیت لالوړوالي برخه کې خورا زیاتې هلې ځلې کړې، چې د ښوونکو د مسلکي روزنې او پراختیا لپاره د ټول هېواد په ولسوالیو کې د علمي غړو ګمارل، د مرکز په شمول د ټولو لیرې پرتو سیمو د تشکیلاتو متوازن وېش او لاپراخوالی یې د نمونې په توګه یادولی شو.
دغه راز يو شمېر نورو مسئولینو هم د علمي سیمینارونو د ګټو په اړه آمرینو ته اغېزناکې ویناوې وکړې او هغوی یې خپلو اساسي موخو ته متوجې کړل.
غونډه دعائیې په لوستلو سره پای ته ورسېده.
