د کندهار له پوهنې ریاست څخه خبرونه
د کندهار ولايت د ژېړۍ ولسوالۍ د پوهنې آمر مولوي حضرت شاه د خپل کاري ټيم سره د يادې ولسوالۍ د زاهديه، روحانیه او حقانيه له مدارسو او همدارنګه د پير محمد او قاضي عبدالمجيد لیسو له اداري او تدريسي چارو څخه ليدنه وکړه او په ورته وخت کې د يادې ولسوالۍ د پوهنې ستونزې یې له نږدې وڅارلې او د ستونزو د حل په موخه یې ځینې لارښوونې ورته وکړې.
د کندهار د صوفي لیسې آمر د همدې لېسې د ښوونکو په مرسته د يادې لېسې ودانۍ یې په خپل شخصي لګښت ترميم او رنګ کړې. د ښار د پوهنې آمریت د يادې لېسې د آمر او ښوونکو دغه کړنه وستایله او نور يې هم د ورته کړنو د ترسره کولو لپاره وهڅول.
د کندهار ولايت د شاولي کوټ ولسوالۍ د پوهنې آمر حاجي محمود د يادې ولسوالۍ د ویان د منځني ښوونځي له تدريسي او اداري چارو ليدنه وکړه او د يادې ښوونځي له ښوونکو سره يې د هغوى د ښوونيزو او روزنیزو فعاليتونو د ښه والي په باب خبرې وکړې.
د کندهار د پوهنې ریاست په نویو اجراآتو کې حاجي مولوي محمد د دې ولایت د مرکز اړوند د میربازار لېسې د آمر په توګه وټاکل شو او د دغه ښار د پوهنې د آمر حافظ مولوي محمد عثمان روحاني له خوا اړوندو کارکوونکو ته ور وپېژندل شو.
همدارنګه د کندهار ولایت د کښته میوند ولسوالۍ د پوهنې آمریت د SHAO موسسې په مالي مرسته د لمریزې برېښنا په سیستم سمبال شو.
د دې ولسوالۍ د پوهنې آمر د يادې ادارې له دوامداره مرستو څخه مننه او قدرداني وکړه.
