د کابل ښار له ښوونځیو څخه د ځانګړو څېړنو پر پایلو بحث وشو
د پوهنې وزارت د څارنې او ارزونې پلاوي، د کابل ښار په ښوونځیو کې د شته ننګونو د حل او د تعلیمي وضعیت د لاښه والي په موخه، د یاد ښار په بېلابېلو ناحیو کې له ۱۶ ښوونځیو څخه لیدنه وکړه او د ښوونځیو پرمختګونه، ستونزې او نیمګړتیاوې یې له نیږدې وڅېړلې.
په هغه غونډه کې چې د يادو څېړنو د پايلو په اړه د بحث په موخه جوړه شوې وه، پکې د پوهنې وزارت سرپرست الحاج مولوي حبيب الله آغا، د کيفيت تضمين، ښوونې او روزنې، سرچنېو او ادارې معینانو سربېره، د بشري سرچينو او اداري پراختیا لوی رئیس او د پو هنې وزارت اړوند د يو شمېر نورو څانګو رئیسانو هم ګډون درلود.
غونډه د قرآن عظیم الشان د څو مبارکو آیتونو په تلاوت سره پیل شوه.
ورپسې د پوهنې وزارت د کیفیت تضمین معین الحاج مولوي عبدالخالق صادق، په مجلس کې د بحث وړ موضوعات بیان کړل او د غونډې ګډون والو ته یې، د کابل ښار د ښوونځیو د پرمختګونو او نیمګړتیاوو راپور په تفصیلي ډول وړاندې کړ.
په پای کې د پوهنې وزارت سرپرست د څېړنو پایلې راټولې او او په ښوونځيو کې یې د ستونزو او ننګونو د حل په موخه، اړوندو رياستونو ته لازمې لارښوونې وکړې.
غونډه د دعائیې په لوستلو سره پای ته ورسېده.
