د ښوونې او روزنې په برخه کې د ټیکا د دوه نويو پروګرامونو له مخې، د ۱۰۰ تنو ښوونکو لپاره د ښوونيز پروګرام چمتو کول او د کابل پلچرخي او قندهار ولایت کې د دوه بابه ښوونځیو جوړیدل:
پوهنې وزارت- کابل: په افغانستان کې د ترکې هیواد د همکارۍ او همغږۍ دفتر ( ټیکا ) د خپلو همکاریو پر دوام غواړي، چې د کابل پلچرخي او کندهار ولایت کې دوه بابه ښوونځې جوړ او د ۱۰۰ تنو ښوونکو لپاره یو ښوونیز پروګرام چمتو کړي.
دا خبري د پوهنې وزیر ښاغلي ډاكټر محمد میرویس بلخي او د ټیکا رئیس ښاغلي رجايي قلنچ ترمینځ ترسره شوې.
ښاغلي بلخي د هيواد د ښوونې او روزنې په برخه كې د ټيکا له پاملرني خوښي وښوده او په دې برخه كې يې د ياد بنسټ د همکاریو د دوام او غښتلتیا غوښتونکي شو.
د ترکې هیواد د همکارۍ او همغږۍ دفتر ټیکا رئیس رجايي قلنچ په دې لیدنه کې د نوموړي بنسټ لخوا ترکې هیواد ته د کابل او ولایتونو نه د ۳۷ تنو زده کوونکو د لیږلو خبر هم ورکړ.
ښاغلي قلنچ همدارنګه وویل، چې د ترکي ( T R T ) تلویزیون هوډ لري، چي په کابل کې د ۶۰ تنو زده کوونکو لپاره د (ویدیوګرافي) یوه څلور ورځنې ښوونيزه دوره چمتو کړي.
د ویلو ده، چي د تركې هيواد د همكارۍ او همغږۍ دفتر ټیکا غواړي په پلچرخي کې د اوسیدونکو مهاجرو ماشومانو لپاره د ۸ ټولګيو درلودونكى يو باب ښوونځی او دغه شان په قندهار کي يو باب ښوونځى جوړ کړي.
