د ښوونکو مسلکي پراختیا رئیس په رسمي سفر پکتیا ولایت ته ورسېد

د پوهنې وزارت د ښوونکو مسلکي پراختیا رئیس محترم مولوي محمد ابراهیم «عمري» پکتیا ولایت ته د خپل سفر په ترڅ کې، د یاد ولایت له پوهنې رئیس محترم الحاج مولوي عبدالقیوم «فاروقي» سره وکتل او د خپل کاري پلان اړوند مسایلو په اړه یې ورسره خبرې وکړې.

په یاده غونډه کې، د مسلکي پراختیا رئیس وویل: "لومړی به موږ یوه لومړنۍ سروې ترسره کړو او د هغې پر بنسټ به د صنفي اصولو د ټولګیو ښوونکو ارزونه وکړو. د سیمینار له ترسره کولو وروسته به دویمه ارزونه ترسره شي، تر څو معلومه شي، چې سیمینار د دوی د مسلکي وړتیاوو په لوړولو کې څومره اغېزمن و."

ورپسې د پکتیا پوهنې رئیس له پلاوي څخه د هرکلي پرمهال وویل: "هغه سیمینارونه چې په تېرو وختونو کې ترسره شوي یوڅه مثبتې پایلې یې لرلې دي؛ مګر موږ تاسو ته ډاډ درکوو چې همدغه سیمینار به غوره او ډېرې اغېزمنې پایلې له ځان سره ولري."

په پلان کې ده چې د پوهنې وزارت د ښوونکو مسلکي پراختیا ریاست، د پکتیا ولایت پوهنې ریاست سره په همغږۍ او د یوې تعلیمي همکارې ادارې په مالي ملاتړ، د ۵۰۰ تنو ښوونکو، ۱۱۵ تنو آمرینو او د ښوونځیو د شوراګانو ۵۰۰ تنو غړو لپاره یو سیمینار جوړ کړي.