د ښوونکو د ټرینرانو (روزونکو) لپاره د ظرفیت لوړونې لس ورځنی پروګرام پای ته ورسېد
د ښوونکو د ټرینرانو(روزونکو) د ظرفیت لوړونې لس ورځنی پروګرام چې د پوهنې وزارت د ښوونکو د مسلکي پراختیا ریاست له لوري د هیواد په څلورو ولایاتو(پکتیا، لغمان، کاپیسا او ډایکندي) کې د ( ترویج آموزش و یادگیری موثر) تر عنوان لاندې ټرینرانو ته شروع شوی وو، پای ته ورسېد.
په یاد ښوونیز او روزنیز پروګرام کې د ښوونې بنسټونه، د تدریس فعال میتودونه، د درسي ټولګي مدیریت او د مسلکي پرمختیا د طریقو او ځینو نورو اړینو موضوعاتو په اړه له ټرینرانو سره هر اړخیز علمي او مسلکي معلومات شریک شول.
هغه ټرینران چې په یاد پروګرام کې یې برخه درلوده په نږدې راتلونکي کې به د یادو څلورو ولایاتو(۵۶۶) تنه ښوونکو ته د ظرفیت لوړونې سیمینار دایر او لوستل شوي موضوعات به هغوی ته تدریس کړي.
د یادونې وړ ده، چې د ښوونکو دمسلکي انکشاف ریاست د پوهنې وزارت د ښوونې او روزنې د معینیت اړوند ریاست دی، چې مولوي سمیع الحق حماس یې د رئیس په توګه دنده اجراء کوي او د هیواد په بیلابیلو ولایتونو کې د ښوونکو د ظرفیت او تدریسي مهارتونو د لوړولو په برخه کې کار کوي او هم د هیواد د دارالمعلمینونو چارې تنظیموي.
