د ښوونکو د ظرفیت لوړونې سیمینار ارزونه
پوهنې وزارت،کابل: د ریاضي او ساینسي مضامینو ښوونکو ته زده کړیز سیمینار چې د دلوې په ۱۷ نیټې پیل شوی وه پای ته ورسېد.
په دې ۲۲ ورځني سیمینار کې د کابل ښار او ولسوالیو ۱۰۰ تنو ښوونکو ګډون کړی و.
یاد سیمینار د افغان-استراليا د پرمختيايي او بيارغونې موسسې په مالي او تخنيکي مرسته داير شو او د سيمينار ګډون والو وکولاى شول چې په ياده شوې موده کې د ساينس او تعليمي ټکنالوژۍ د ښوونکو له تجربو او علمي لاسته راوړنو څخه د درسي ميتودنو او د لابراتواري توکيو د کارونې په برخه کې ګټه واخلي.
د ساينس او تعليمي ټکنالوژۍ مرکز عمومي رييس پوهندوى سيد اصغر حيدري د زده کوونکو د زده کړې په برخه کې د ياد مرکز د تجربو د عملي کولو پر اهميت خبرې وکړې او د سيمينار له ګډون والو يې وغوښتل چې خپله پوهه او تجربې له زده کوونکو سره شريکې کړي.
او همدارنګه يې د افغان-استراليا له پرمختيايي او بيا رغونې موسسې څخه مننه وکړه.
د محفل په پاى کې ښوونکو او د سيمينار ګډون والو ته له سيمينار څخه د فارغيدو تصديق پاڼې وويشل شوې.
