د پوهنې وزارت کارکوونکو ته د کمپیوټر، انګلیسي او عربي ژبو روزنیز کورسونه جوړ شول

د پوهنې وزارت د بشري سرچینو او پراختیا لوی ریاست د تشکیلاتو ریاست 
د کارکوونکو د ظرفیت لوړولو په موخه د کمپیوټر، عربي او انګلیسي ژبو د زده کړې روزنیز ټولګي جوړ شول.
د پوهنې وزارت د بشري سرچینو او پراختیا لوی رئیس، مفتي محمد یوسف ثاقب، په داسې حال کې چې د پوهنې وزارت د تشکیلاتو رئیس، مفتي عبدالحلیم حلیمي، د استخدام رئیس مولوي محمد صادق صدیقي، هم ورسره ملتیا کوله د دې روزنیز پروګرام پرانیستنه وکړه.
د بشري سرچینو لوی رئیس د یاد روزنیز پروګرام د پرانیستلو په مراسمو کې د کارکوونکو پر مسلکي والي د ټینګار ترڅنګ د روزنیز پروګرام پر ګټو تفصیلي خبرې وکړې. 
ور پسې د تشکیلاتو او استخدام رئیسانو د خپلو خبرو په ترڅ کې له کارکوونکو څخه وغوښتل، چې حاضري ته جدي پاملرنه وکړي او د روزنیز پروګرام له محتوا څخه په ښه توګه ګټه پورته کړي. 
د يادونې وړ ده، چې دغه روزنيز پروګرام به په ټوليزه توګه درې مياشتې دوام وکړي او د زده کړې بهير به د تجربه لرونکو استادانو له لوري پر مخ وړل کېږي.