د پوهنې وزارت محترم ستر سلاکار تخار ولایت ته رسمي سفر وکړ
د پوهنې وزارت ستر سلاکار محترم الحاج مولوي سید غیاث الدین آغا د کلتوري پروګرامونو پلي کولو او د ښوونځیو له کتابتونونو څخه د نامطلوبو مطالعاتي کتابونو راټولولو لپاره تخار ولایت ته ورسېد.
په پیل کې پلاوي د پوهنې له رئیس او پروګرامونو مدیرانو، د ولسوالیو د پوهنې چارواکو او د یاد ولایت د ښوونځیو له مدیرانو سره د همغږۍ وکړه.
په دغه غونډه کې، د تخار ولایت پوهنې رئیس یاد پلاوي ته د ښه راغلاست ترڅنګ، د تعلیمي فعالیتونو د اهمیت او ارزښت، په دنیوي او اخروي ژوند کې د کتابونو رول او د ځوان نسل د فکري ودې په برخه کې د هغوی د اهمیت په اړه خبرې وکړې او د تعلیمي محتوا او د کتابونو مطالعې په اړه یې د نږدې څارنې پر اړتیا باندې هراړخیزې خبرې وکړې.
ورپسې د پوهنې محترم ستر سلاکار د کتابونو او تعلیمي سرچینو په نږدې څارنې د ټینګار پرمهال وویل، چې پوهنې وزارت د ځوان نسل د سالمې او اسلامي زدهکړې په وړاندې دروند مسئولیت لري.
همدارنګه نوموړي د یو شمېر ښوونځیو له کتابتونونو څخه هم لیدنه وکړه او د مناسبو کتابونو د تنظیم، ساتنې، کارولو او مطالعې په اړه یې اړینې سپارښتنې وکړې.
