د پوهنې وزارت له کارکوونکو څخه د دیني علومو ازموینې لړۍ پیل شوه
د امربالمعروف او نهی عن المنکر وزارت د لارښوونې په رڼا کې او د پوهنې وزارت د دعوت او ارشاد ریاست د ځانګړي مهالوېش له مخې، نن د یاد وزارت د خدماتو ریاست له کارکوونکو څخه «د جهاد او معاملاتو په برخه کې» ازموینه واخیستل شوه او په پلان کې ده چې په راتلونکو ورځو کې د وزارت د نورو ریاستونو د منسوبینو لپاره هم ورته ازموینه ترسره شي.
یاده ازموینه د پوهنې وزارت په جومات کې ترسره شوه، چې لومړی پړاو پکې د خدماتو ریاست څخه شاوخوا (۶۰۷) تنو ګډون درلود.
د دعوت او ارشاد ریاست مسئولینو وویل چې له یادې ازموینې څخه یې اساسي موخه د اوامرو اطاعت، ديني چارو ته د کارکوونکو هڅول، د الهي قوانینو پلي کول او په دیني برخه کې د منسوبینو ارزول دي؛ ترڅو په فکري او عقیدتي برخو کې د پوهنې کارکوونکو معلومات لاپسې بډايه او هغوی خپلو اساسي موخو ته متوجې شي.
د یاد ریاست چارواکو، چې د ازموینې پروسې څخه یې څارنه کوله، ژمنه وکړه چې د کارکوونکو د ازموینې پروسې تر بشپړېدو وروسته به پایلې ډېر ژر اعلان او غوره اشخاصو ته به ستاینلیکونه او جایزې ورکړل شي.
