د پوهنې وزارت له لوري د ښوونکي نړیواله ورځ د يو لړ شانداره مراسمو په ترڅ کې ولمانځل شوه
د کابل ښار په اماني عالي لېسه کې د ښوونکي نړیواله ورځ د يو لړ شاندارو مراسمو په ترڅ کې، چې پکې د رياست الوزراء اداري مرستيال الحاج مولوي عبدالسلام حنفي، د افغانستان.ا.ا.د چارو ادارې لوی رئيس، شیخ مولوي نورالحق انور، د پوهنې وزارت سرپرست الحاج مولوي حبيب الله آغا، د ياد وزارت معينانو، مرکزي رئيسانو، د کابل ښار پوهنې رئيس، علماوو، مشرانو، د يو شمېر لېسو ښوونکو او زده کوونکو ګډون درلود، ولمانځل شوه.
غونډه د قرآن کريم په څو مبارکو آیتونو سره پيل شوه، ور پسې د پوهنې وزارت سرپرست الحاج مولوي حبيب الله آغا، د هېواد ټولو ښوونکو ته د هغوی د وياړلې ورځې په مناسبت مبارکي وويله او څرګنده يې کړه، چې د هېواد ټولو بچيانو ته د ديني او عصري علومو د زده کړو لپاره آسانتياوې برابرول يې له لومړنيو موخو څخه دي.
همدارنګه نوموړي د پرديو له احتیاج څخه د هېواد د خلاصون يوازینۍ لاره د ښوونيز نظام پياوړتيا وبلله.
په ورته مهال د پوهنې وزارت د کيفيت تضمين معين، الحاج مولوي عبد الخالق صادق، ښوونکو ته د یادې ورځې مبارکي وويله او هغوی يې د ټولنې بنسټ اېښودونکي او د روښانه ذهنیت جوړونکي وبلل.
په ياده غونډه کې د رياست الوزراء اداري مرستيال الحاج مولوي عبدالسلام حنفي، د هېواد ټولو ښوونکو ته د هغوی د ورځې د مبارکۍ په ترڅ کې وويل، چې د ا.ا په راتګ سره د پوهنې په برخه کې د پام وړ پرمختګونه راغلي دي.
نوموړي، له ټولو ښوونکو څخه وغوښتل، چې د هېواد پر ځان بساينې او پرمختګ په موخه، نوی نسل او د هېواد بچيان پر اسلامي او ملي روحيه وروزي.
د غونډې په ترڅ کې د ښوونځيو او مدارسو زده کوونکو خپل چمتو کړي، نعتونه، ترانې او شعرونه ولوستل، چې د ګډون والو د خوښۍ او پاملرنې وړ وګرځېدل.
د غونډې په پای کې د پوهنې وزارت د مشرتابه له لوري يو شمېر رئيسانو، ښوونکو او استادانو ته د هغوی د نه ستړې کېدونکو خدمتونو له امله ستاينليکونه ورکړل شول.
غونډه د دعائیې په لوستلو سره پای ته ورسېده.
