د پوهنې وزارت سرپرست ننګرهار ولایت ته د خپل سفر په ترڅ کې د ننګرهار عالي لېسې او«نجم الدين آخوندزاده» له دارالعلوم څخه لیدنه وکړه
د پوهنې وزارت سرپرست الحاج مولوي حبیب الله آغا د ننګرهار ولایت پوهنې رئيس او یو شمېر مسئولینو سره یو ځای د یاد ولایت د ننګرهار عالي لېسې او«نجم الدين آخوندزاده» له دارالعلوم څخه دليدنې پر مهال، د دغو ښوونيزو بنسټونو مدرسینو استادانو،طلابو او زده كوونكو سره له نیږدې وکتل.
د پوهنې وزارت سرپرست او ورسره مل پلاوى لېسې او دارالعلوم ته د داخلېدو پر مهال د مسئولینو، ښوونکو او زده کوونکو له تود هرکلي سره مخامخ شو.
همدارنګه نوموړي وويل: د هېواد د پرمختګ او ښېرازۍ يوازينۍ لار پوهنه ده او د پوهنې وزارت ژمن دى، تر څو د هېواد بچیانو لپاره د سالمې زده کړې په برخه کې لازمې آسانتیاوې برابرې کړي.
په یاده کتنه کې د نجم الدين آخوندزاده دارالعلوم مسئول، يو شمېر علماوو او د خلکو استازو د هېواد ماشومانو او ځوانانو د زده کړې په برخه کې د پوهنې وزارت د مشرتابه له هلو ځلو څخه قدرداني وکړه او ژمنه يې وکړه چې د پوهنې پرمختګ په برخه کې به له پوهنیزنظام سره هر راز همکاري وکړي.
