د پوهنې وزارت سرپرست د بلخ ولایت «افغان – ترک لېسې» څخه د لیدنې په ترڅ کې د ترکیې هېواد له قونسل سره وکتل
د پوهنې وزارت سرپرست الحاج مولوي حبیب الله آغا، بلخ ولایت ته د خپل رسمي سفر په ترڅ کې، چې موخه یې د ځينو ښوونیزو او روزنیزو پروژو پرانیستل او د یاد ولایت د پوهنیز وضعیت ارزول وو، نن د مزارشریف ښار کې «د افغان – ترک لېسې» څخه لیدنه وکړه.
نوموړی یادې لېسې ته په داخلېدلو سره د مسئولینو او استادانو له تود هرکلي سره مخامخ شو.
د پوهنې وزارت سرپرست د یادې لېسې له درسي خونو، لابراتوار او کتابتون څخه د لیدنې پر مهال، د همدې ښوونځي د درسي بهير په تړاو مفصل معلومات ترلاسه کړل او بيا يې په مزارشريف کې د ترکیې هېواد له قونسل وکتل. نوموړي په دې ليدنه کې د دواړو هېوادونو ترمنځ د مشترکاتو او دوستانه اړيکو مخينې ته په اشارې سره، د افغانستان د بیارغونې په ځانګړې توګه د ښوونې، روزنې او ښوونځيو جوړولو په برخه کې د ترکیې هېواد له همکاریو مننه وکړه.
