د پوهنې وزارت د کیفیت د تضمین معین د نیمروز ولایت له جهادي مدرسې څخه لیدنه وکړه
د پوهنې وزارت د تضمین کیفیت معین الحاج مولوي عبدالخالق صادق په داسې حال کې چې د نیمروز ولایت د پوهنې رئیس او د اسلامي تعلیماتو آمر هم ورسره ملګري وو، د عالیقدر امیرالمؤمنین د شفاهي حکم او د پوهنې وزارت د مقام د رسمي سپارښتنې په اساس، د نیمروز ولایت له جهادي مدرسې څخه لیدنه وکړه.
په یاده لیدنه کې محترم معین صاحب د جهادي مدرسې له مسئولینو، استادانو او زده کوونکو سره له نږدې ولیدل او د هغوی وړاندېزونه یې واورېدل.
معین صاحب په جهادي مدرسه کې په یوه شانداره غونډه کې چې د نوموړي د هرکلي په مناسبت جوړه شوې وه، د علم د فضیلت، د وخت د پابندي، د مشرانو د اوامرو د اطاعت، د استادانو او والدینو د احترام او حسنه اخلاقو په هکله ارزښتناکې خبرې وکړې، هغوی یې خپلو دندو ته متوجه کړل او هم یې د مدرسې د مسئولینو او استادانو علمي خدمات د قدر وړ وبلل او د علم او اخلاقي فضایلو د تعمیم په برخه کې یې د هغوی هلې ځلې وستایلې.
تر غونډې وروسته معین صاحب د یادې مدرسې د تدریسي او اداري چارو، د زدکوونکو د علمي سویې، د مدرسې د چاپېریال، غذایي رژیم، روغتیايي انتظام، ودانۍ، امنیت، د زده کوونکو د صورت او سیرت او نورو اړینو مسایلو ارزونه وکړه او مسئولینو ته یې سپارښتنې وکړې.
