د پوهنې وزارت د ښوونکو د روزنې او مسلکي پراختیا د ګمارنې کمېټې غونډه د یاد وزارت د سرپرست په حضور کې جوړه شوه
د پوهنې وزارت د ښوونکو د روزنې او مسلکي پراختیا د ګمارنې کمېټې غونډه، د پوهنې وزارت د سرپرست الحاج مولوي حبیب الله آغا، د یاد وزارت د معینانو، د یو شمېر مرکزي ادارو د رئیسانو او د ښوونکو د روزنې- مسلکي پراختیا او د بشري سرچینو د ریاستونو د یو شمېر مسئولینو او کارپوهانو په ګډون جوړه شوه.
یاده غونډه د الله پاک(جل جلا له) د سپېڅلي کلام د څو مبارکو آیتونو په تلاوت سره پیل شوه؛ ورپسې د غونډې د مسئولینو له لوري د ګمارنو راپور غونډې ته وړاندې شو، چې په یوه برخه کې یې داسې راغلي ؤ:
د یاد وزارت د ښوونکو د روزنې او مسلکي پراختیا ریاست ته ټولټال ۴۱۴۸ خالي بستونه ځانګړي شوي وو او پر بنسټ یې د ښوونکو د روزنې او مسلکي پراختیا کمېټه وتوانېدله، چې په تېره یوه میاشت کې په ۲۶۵۳ ځانګړو شویو بستونو کې تکړه او با استعداده کسان د هغوی د تحصیلي کچې او د نمرو فیصدۍ ته په پاملرنې سره وګماري، چې په ترڅ کې یې۵۱۴ تنه د ښوونیزې څارنې د غړو په توګه، ۱۱۷ تنه د ښځینه وو څانګې د علمي غړو او په یاد تشکیلاتي جوړښت کې ۲۰۲۲ تنه د نارینه علمي غړو په توګه ټاکل شوي دي.
همدارنګه په پام کې ده، چې د پوهنې وزارت د مشرتابه د لارښوونې او د ګمارنې کمېټې تر تاییدۍ وروسته، پاتې ۱۴۹۵ کسان د هغوی د تحصیلي کچې او کاري تجربې ته په کتو د دارالمعلمینونو د استادانو او د ښوونیزې څارنې د غړو په توګه وګمارل شي.
له همدې امله په یاده غونډه کې پرېکړه وشوه، چې د ولایتونو په ښوونځیو کې د ښځینه ښوونکو د وړتیا لوړونې او ملاتړ په موخه دې د ښځینه ښوونکو د روزنې او مسلکي پراختیا ټېم جوړ شي.
په ورته مهال په یو شمېر اړوندو ولایتونو کې د دریمې ژبې د ښوونکو لپاره د اړتیا وړ خالي بستونو د ځانګړي کولو په اړه بحثونه ترسره او په تړاو یې لازم تصمیمونه ونیول شول.
یاده کاري او مشورتي غونډه د دعائیې په لوستلو سره پای ته ورسېده.
