د پوهنې وزارت د څارنې او ارزونې ریاست د کارکوونکو لپاره د ظرفیت لوړونې سیمینار جوړ شو
د پوهنې وزارت د کیفیت د تضمین معینیت تر چتر لاندې د څارنې او ارزونې ریاست کارکوونکو ته د ظرفیت لوړونې څلور ورځنی ورکشاپ جوړ شو.
د څارنې او ارزونې د رئيس غلام ربي رباني په وینا: د دغه روزنيز پروګرام له ترسره کېدو يې موخه په مرکز او ولايتونو کې د پوهنې رياستونو د ستونزو د لرې کولو او د اغېزمنې څارنې په برخه کې د کارکوونکو د مسلکي پوهاوي د کچې لوړول دي.
نوموړي د ياد سيمينار له ګډونوالو وغوښتل، چې د یاد ښوونيز پروګرام له محتوا څخه سمه ګټه پورته کړي.
د څارنې او ارزونې رئیس د خپلو خبرو په جریان کې زیاته کړه: په پام کې ده چې له دغه ښوونيز سيمينار څخه وروسته یاد کسان د هېواد ولایتونو او ولسوالیو ته د څارنې او ارزونې په موخه لاړ شي او د ترلاسه شویو زده کړو څخه په دې برخه کې کار واخلي.
