د پوهنې وزارت د سرپرست وزیر له لوري د قرآنکریم یو (۹) نهه کلن حافظ ته ستاینلیک ورکړل شو
د پوهنې وزارت د سرپرست وزیر الحاج مولوي حبیب الله آغا له لوري د حافظ عبدالغني تعلیم په نوم یو تن (۹) نهه کلن ماشوم ته د قرآن عظیم الشان د بشپړ حفظ د سعادت د حاصلولو په ویاړ ستاینلیک او د پوهنې نښان ورکړل شو.
حافظ القرآن عبدالغني تعلیم د الحاج مولوي پاینده محمد تعلیم زوی او د ارزګان ولایت مرکز ترینکوټ اوسیدونکی دی، نوموړی د هېواد تر سترې فتحې وروسته د کابل ولایت اړوند په افغان دارالعلوم کې شامل او سږ کال یې د نهه کلنۍ په عمر کې د قرآن عظیم الشان د بشپړ حفظ سعادت تر لاسه کړ.
نوموړی په یوه غونډه کې چې د پوهنې وزارت سرپرست وزیر، معینانو او مرکزي رئیسانو پکې برخه درلوده، په ستاینلیک او د پوهنې وزارت په نښان ونازول شو او په راتلونکې کې ورته د لا زیاتو بریالیتوبونو دعا او هیله وشوه.
