د پوهنې وزارت د دعوت او ارشاد ریاست له لوري اصلاحي غونډه ترسره شوه
په هغه اصلاحي غونډه کې چې د پوهنې وزارت د دعوت او ارشاد د رئيس الحاج مولوي جمعه خان سروري په مشرۍ جوړه شوې وه، پکې د پوهنې وزارت چارواکو، د مرکزي ادارو رئيسانو، د څانګو مسئولينو او کارکوونکو ګډون درلود.
غونډه د قرآن عظیم الشان د څو مبارکو آيتونو په تلاوت سره پيل شوه؛ ورپسې د پوهنې وزارت د دعوت او ارشاد رئيس حاضرينو ته ښه راغلاست ووايه او د اسلام د سپېڅلي دين په ارزښت او اهمیت د خبرو ترڅنګ، د اسلام د ستر لارښود حضرت محمد «صلی الله عليه وسلم » په سلوک، کړنو او سنتو يې خبرې وکړې او د پوهنې وزارت کارکوونکو ته یې لارښوونه وکړه، تر څو په خپلو ورځنیو دندو چارو کې د اسلامي شریعت احکام په بشپړ ډول پلي کړي.
همدارنګه نوموړي د افغانستان.ا.ا. د عالي مشرتابه فرمانونه د پوهنې وزارت کارکوونکو ته تشرېح کړل او له ټولو کارکوونکو يې وغوښتل، چې د رسول الله (صلی الله علیه وسلم) له سنتو سره سم خپل صورت او سیرت برابر او پینځه وخته لمونځونه په جماعت سره اداء کړي.
په پای کې د پوهنې وزارت د دعوت او ارشاد رئیس د یاد وزارت ټولو کارکوونکو ته توصیه وکړه، تر څو په ورسپارل شوي امانت کې خیانت ونه کړي او خپلې ورسپارل شوې دندې په پوره امانتدارۍ سرته ورسوي، خپل دین او هېواد ته د قدر وړ خدمتونه ترسره کړي.
غونډه د دعائیې په لوستلو سره پای ته ورسېده.
