د پوهنې وزارت د دعوت اوارشاد رئیس بدخشان ولایت ته په رسمي سفر ولاړ
د پوهنې وزارت د دعوت او ارشاد رئیس مولوي جمعه خان سروري بدخشان ولایت ته د خپل رسمي سفر په ترڅ کې، د یاد ولایت د پوهنې رئیس الحاج مولوي نصرت الله فیضاني، د یو شمېر کلیدي ادارو مسئولینو او کارکوونکو سره وکتل.
په پیل کې د یاد ولایت پوهنې رئیس د پوهنې وزارت د دعوت او ارشاد رئیس او ورسره مل پلاوي ته ښه راغلاست ووایه او د دغه ریاست د دندو په اړه یې لنډ راپور د دعوت او ارشاد پلاوي ته وړاندې کړ.
په ورته مهال د پوهنې وزارت د دعوت او ارشاد رئيس بدخشان ولايت ته د خپل سفر د موخو په اړه خبرې وکړې او ويې ويل، ديني زده کړې د ټولنې په هر اړخیز پرمختګ او اصلاح کې تر ټول مهم او کلیدي نقش لري.
نوموړي څرګنده کړه: دعوت او ارشاد د اسلام د سپېڅلي دين یو له بنسټیزو دندو څخه دی، چې د همدې لپاره پيغمبران «عليهم السلام» رالېږل شوي دي.
د دعوت او ارشاد رئیس د یاد ولايت د پوهنې له مسئولينو وغوښتل، چې د اسلام د ستر لارښود حضرت محمد«صلی الله علیه وسلم» د سنتو پلي کولو ته جدي پاملرنه وکړي او له هغو سره سم خپل صورت او سیرت برابر کړي.
نوموړي همدا راز لارښوونه وکړه، چې د يادې ادارې استازي دې د ولسواليو ټولو ښوونځيو او پوهنې آمریتونو ته د مبلغینو په توګه ور وپېژندل شي.
په پای کې د بدخشان د پوهنې ریاست مسئولینو د دعوت او ارشاد د ټولو لارښوونو او فرمانونو د پلي کولو ډاډ څرګند کړ.
