د پوهنې وزارت د دارالعلومونو رئیس له بي بي عایشه صدیقه(رض) دارالعلوم څخه لیدنه وکړه
د پوهنې وزارت د اسلامي زده کړو معینیت د دارالعلومونو رئيس مولوي عبدالقدوس قدوسي، په داسې حال کې چې د یاد معینیت یو شمېر کارپوهانو یې ملتیا کوله، د کابل ښار په پنځمه ناحيه کې له بي بي عايشه صديقه (رض)دارالعلوم څخه ليدنه وکړه.
د ياد پلاوي په وينا، د لیدنې موخه یې د ياد دارالعلوم تدريسي، اداري او امنيتي وضعيت ارزونه وه او په جلا جلا توګه د يادې ادارې له مسئولينو او زده کوونکو سره، د پلانونو، درسي پروګرامونو او د هغوی د شته ستونزو په هکله خبرې وې.
په پیل کې پلاوي له مخکینۍ اجنډا سره سم، د یادې ادارې له آمر، ښوونکو او زده کوونکو او وروسته یې، د زده کوونکو له والدینو، مخورو او د هغه ځای له وکیلانو سره وکتل او د علاقې وړ موضوعاتو په اړه یې ورسره خبرې وکړې.
په ورته مهال، د یاد دارالعلوم استادانو او زده کوونکو یادې ادارې ته د پلاوي په ورتګ خوښي څرګنده کړه او خپلې ستونزې او وړاندیزونه یې اداري پلاوي ته وړاندې کړل.
په پای کې د پوهنې وزارت د دارالعلومونو رئیس مسئولینو ته، د یاد دارالعلوم د ښوونیز بهیرد لاښه والي په موخه یو شمېرلارښوونې وکړې.
