د پوهنې وزارت د تضمین کیفیت د کارکوونکو لپاره د ظرفیت لوړونې سیمینار جوړ شو
د پوهنې وزارت د احصایې او معلوماتو او د پوهنې وزارت د څارنې او ارزونې ریاستونو د آمرینو، مدیرانو او یو شمېر کارکوونکو لپاره د ورځنیو چارو د لا ښه پېژندنې په موخه شپږ ورځنی روزنیز سیمینار جوړ شو.
غونډه د قرانکریم د سپیڅلي کلام د څو مبارکو آیاتونو په تلاوت سره پیل شوه.
په پیل کې د پوهنې وزارت د کیفیت د تضمین معین الحاج مولوي عبدالخالق صادق حاضرینو ته د ښه راغلاست په ترڅ کې وویل چې د دغه سیمینار موخه د کارکوونکو د ظرفیتونو د کچې لوړول او پېژندنه ده. کارکوونکو ته یې په خطاب کې وویل، چې خپلې دندې په مسلکي ډول ترسره کړي.
هغه د امانت د اصولو او ګټو په اړه خبرې وکړې او ویې ویل، چې موږ باید د خپلو شخصي ګټو پر ځای د ملت سترې ګټې په پام کې ونیسو او باید په ځان کې د حضرت یوسف (ع) ځانګړنې پیدا کړو.
ورپسې د پوهنې وزارت د احصایې او معلوماتو رئیس الحاج مولوي بسم الله نعماني د سیمینار ګډونوالو ته وویل: مبارزه په دوه ډوله ده، یوه یې نظامي مبارزه ده، چې په دې لاره کې مو بریا ترلاسه کړه. او بله فکري مبارزه ده چې په دې لاره کې هم اړینه ده ځانونه چمتو کړو، ترڅو مطلوبه بریا ته ورسېږو او په دې برخه کې ستاسو هڅې او کوښښونه خورا اړین دي چې د مسلکي روزنې لپاره دوامداره هڅې وکړئ.
په پاى کې د دغه وزارت د بشري سرچینو د عمومي ريس په استازيتوب طارق ميوند هم د ياد شوي سيمينار په اړه خبرې وکړې او له ګډونوالو يې وغوښتل چې د اوسني سيمينار له محتوا څخه ډېره ګټه پورته کړي.
