د پوهنې وزارت د تشکيلاتو رئيس، سرپل ولايت ته په يوه رسمي سفر ولاړ

 د پوهنې وزارت د تشکيلاتو رئيس مفتي عبدالحليم حليمي په مشرۍ يو پلاوى، د ديني مدارسو د اداري او تدريسي چارو د څارنې او د يادو بنسټونو نويو بستونو ته د وړ کادرونو ګمارنې په موخه، سرپل ولايت ته سفر وکړ.
 په پيل کې د پوهنې وزارت د تشکيلاتو رئيس، د ياد ولايت له پوهنې رئیس، د مرکز او ولسوالیو پوهنې آمرينو، مدېرانو، علماوو او د اسلامي زده کړو بنسټونو له مسئولینو سره وکتل.
  په دې کتنه کې نوموړي ياد ولایت ته د خپل سفر موخې د غونډې ګډون والو ته تشرېح کړې.
 ورپسې يې له اړوندو مسئولينو سره د پوهنې رياست د نوي تشکيلاتي جوړښت د تطبيق په اړه خبرې وکړې.
 دغه راز د پوهنې وزارت د تشکيلاتو رئیس، د پوهنې ریاست له مشرتابه او مسئولینو څخه وغوښتل، چې د نوي تشکيلاتي جوړښت په پلي کولو کې د کارکوونکو وړتيا، تجربې او تقوی په پام کې ونيسي او په پرله پسې توګه په اړوندو بستونو کې له ګمارنې څخه څارنه وکړي. 
 ورپسې د سرپل ولایت پوهنې رئیس، د ياد ریاست یو لړ ستونزې او وړاندیزونه له پلاوي سره شریک کړل او د یادو ستونزو د حل غوښتنه یې وکړه.