د پوهنې وزارت دعوت او ارشاد ریاست له لوري د کابل ولایت پوهنې رياست مبلغينو لپاره یو ورځنی علمي سيمينار پرانیستل شو
د پوهنې وزارت دعوت او ارشاد ریاست له لوري د کابل ولایت پوهنې رياست مبلغينو لپاره یو ورځنی علمي سيمينار، د یاد وزارت د سرچینو او ادارې معین الحاج مولوي صبغت الله وصیل، د دعوت او ارشاد رئیس مولوي جمعه خان سروري، د کابل ولایت پوهنې رئیس مولوي عبدالحق حقاني، د ځینو نورو وزارتونو د دعوت او ارشاد رئیسانو، مسئولینو او مبلغینو په حضور کې جوړ شو.
په پیل کې د کابل ولایت پوهنې رئیس مبلغینو او مېلمنو ته د ښه راغلاست ترڅنګ، د دعوت او ارشاد د موخو او په ټولنه کې یې د مثبت رول په تړاو تفصیلي ویناء وکړه.
ورپسې د یاد وزارت د سرچینو او ادارې معین د خپلو خبرو په ترڅ کې، په بشپړې دیني روحیې سره د هېواد بچیانو پر روزلو ټینګار وکړ او له مبلغینو یې وغوښتل چې د دعوت ارشاد لاره کې په خورا نرمۍ سره چلند وکړي.
نوموړي څرګنده کړه، موږ ته اوسمهال تر ټولو مهم مسئولیت راسپارل شوی، کوم چې د دیني او شرعي مسایلو بشپړ تطبیق دی.
په ورته مهال د پوهنې وزارت د دعوت او ارشاد رئیس مبلغینو ته په خپلو خبرو کې د دعوت او ارشاد ځانګړې کړنلاره او اصول ببان کړل او زیاته یې کړه چې د پوهنې وزارت ټول منسوبین مکلف دي، تر څو خپلې دندې په ټاکلي وخت ترسره او خپل ديني او ملي وجایب اداء کړي.
دغه راز يو شمېر نورو جیدو علماءکرامو او مسئولینو هم د دعوت او ارشاد مبلغینو او منسوبینو ته اغېزناکې ویناوې وکړې او هغوی یې خپلو اساسي مسئولیتونو ته وهڅول.
غونډه دعائیې په لوستلو سره پای ته ورسېده.
