د پوهنې وزارت تر اشراف لاندې د لاس مېنځلو نړیواله ورځ ولمانځل شوه
په هغه غونډه کې چې په همدې مناسبت د کابل ښار د حبیبې لېسې د کنفرانسونو په تالار کې جوړه شوې وه، د پوهنې، عامې روغتیا، حج او اوقاف، کلیو او پراختیا وزارتونو، یونیسف او نورو کورنیو او بهرنیو بنسټونو مسئولینو ګډون کړی وو. په پیل کې د پوهنې وزارت د اساسي او ثانوي زده کړو رئیس مولوي محمد اسحق حقیقي د اسلام له نظره د پاکوالي د ارزښت په اړه تفصیلي خبرې وکړې. ورپسې د عامې روغتیا وزارت په استازیتوب مولوي محمد داؤد منصوري وینا وکړه او د خپلې وینا په یوه برخه کې یې وویل: که د قرانکریم په آیتونو کې ژور فکر وکړو، د ژوند په ټولو برخو کې د پاکوالي اهمیت پکې له ورایه معلومېږي.
په یاده غونډه کې د کابل ښار د پوهنې رئيس مولوي احسان الله خطاب هم د ظاهري او باطني پاکوالي په ارزښت خبرې وکړې او زياته يې کړه چې اسلام نه يوازې ظاهري پاکوالي ته پاملرنه کوي بلکې په باطني پاکوالي هم ټينګار کوي .
غونډه د یونیسف ادارې له خوا د روغتیایی کڅوړو په وېشلو او د خیر په دعا پای ته ورسیده.
