د ولایتونو پوهنې خبرونو ته لنډه کتنه
پکتیا
د پوهنې په برخه کې د یو همکار بنسټ مسئولینو، د پکتیا ولایت له پوهنې رئیس مولوي عبدالوکیل خالد سره په لیدنه کې، د یاد ولایت په ۷ بابه ښوونځیو کې د اوبو رسولو سیسټم (واش پروګرام) د فعالېدو اعلان وکړ.
په یاده پروژه کې د ښوونځيو لپاره د اوبو د څاګانو کیندل، د برېښنا د سولر ښیښو نصبول او یو لړ نورو اړینو ملحقاتو جوړول شامل دي، چې شاوخوا ۴۲ میلیونه افغانۍ لګښت پرې راغلی دی.
د یاد ولايت پوهنې رياست مشرتابه د دغه ادارې له همکارۍ مننه وکړه.
کابل ښار :
د کابل ښار د شپږمې ناحیې یو شمېر دیني علماوو او قومي مخورو له پوهنې رئیس قاري عبدالباسط حقاني سره وکتل او له نوموړي سره یې د خپلو سیمو د پوهنې اړوند ستونزې او وړاندیزونه شریک او د همکارۍ غوښتنه یې وکړه.
هرات
د هرات ولايت پوهنې رئيس مولوي رحمت الله جابر، د یاد ولايت ادرسکن ولسوالۍ ته د خپل رسمي سفر په ترڅ کې، له يو شمېر ښوونځيو او ديني مدارسو څخه ليدنه وکړه.
نوموړي د پوهنې له مسئولينو، ديني علماوو او قومي مخورو سره په کتنه کې د ښوونیز وضعیت لاښه والي او د پوهنې د پراختیا په تړاو رغنده خبرې وکړې.
پکتیا
د پکتیا ولایت پوهنې رئیس له خپلو کارکوونکو سره وکتل.
دغه راز نوموړي د مدارسو او ښوونځیو د ښوونیزو پروګرامونو لاښه والي په اړه د خبرو ترڅنګ، کارکوونکو ته لازمې لارښوونې وکړې.
کابل
د کابل ولایت پوهنې ریاست د یو همکار بنسټ په ملاتړ، د یاد ولایت د سروبي ولسوالۍ د سیمه ییزو او چټکو زده کړو ۳۷ بابه ټولګیو ته کتابونه او ښوونیز توکي واستول.
