د ولایتونو له پوهنې ډګره څو لنډ خبرونه
پکتیا
د پکتیا ولایت احمدآباد ولسوالۍ اړوند سلامخېل لېسې لپاره د ۲۴ زره افغانیو په لګښت د لمریزې برېښنا اسانتیا برابره شوه.
تخار
د تخار ولایت د خواجه بهاءالدین ولسوالۍ کتکجیر لېسې لپاره د سیمې د خلکو د ۱۹۰ زره افغانیو په مالي ملاتړ لمریزه برېښنا نصب او یو پایه کمپیوټر له پرنټر سره برابر شو.
سرپل
په سرپل ولایت کې د کتابونو اړمنو ښوونځیو لپاره ۳۴ زره او ۸۰۳ ټوکه کتابونه راټول او ووېشل شول.
پکتیکا
د پکتیکا ولایت د ارګون ولسوالۍ له منورې منځني ښوونځي سره د سیمې د یوه اوسېدونکي الحاج ملا محمد قاسم لخوا ۶۰ زره افغانۍ مرسته وشوه، چې د صحي اوبو د اسانتیاوو برابرولو او زدهکوونکو ته د جامو په برابرولو کې ولګول شوه.
میدانوردګ
د میدانوردګ ولایت سیدآباد ولسوالۍ اړوند شهید ډاکټر اسدالله منځني ښوونځي سره د یو معارفدوست شخص له لوري ۱۰۰۰ امریکايي ډالره مرسته وشوه، چې د قرطاسیې او اړینو درسي توکو په پېرلو کې مصرف شوې ده.
