د ولایتونو له پوهنې ډګره څو لنډ خبرونه
ننګرهار
د پوهنې وزارت د کیفیت تضمین معینیت یوه پلاوي، د ننګرهار ولایت له پوهنې مشرتابه سره وکتل او د یاد ریاست د کړنو په اړه یې خبرې وکړې.
پلاوي د دغه سفر په ترڅ کې، د ياد رياست د کاري پلانونو او يو شمېر نورو کړنو له پلي کېدو څخه هم څارنه وکړه.
لوګر
د لوګر ولایت پوهنې ریاست مسئولین وايي: د پوهنې وزارت له عادي بودیجې څخه د ۱۶۰ مترو په ژوروالي د اوبو یو څاه برابر او ګټې اخیستنې ته وسپارل شوه.
دایکنډي
د دايکنډي ولايت مرکز اړوند د خرجل لزیر سيمې او د یاد ولایت پاتو ولسوالۍ اړوند د نوجوي، برمني او ونک کليو يو شمېر قومي مخورو، د دغه ولایت له پوهنې رئيس قاري عنايت الله سهار سره د کتنې پر مهال، په خپلو سیمو کې د ښوونځیو او مدارسو د فعالېدو غوښتنه وکړه، چې د پوهنې ریاست له لوري ډاډ ورکړل شو.
سرپل
په سرپل ولایت کې د سواد زده کړې له کورسونو څخه ۴۵۰ تنه فارغ او د یاد ولایت د پوهنې ریاست له لوري پر هغوی باندې تصدیق پاڼې ووېشل شوې.
پکتیکا
د پوهنې په برخه کې یو همکار بنسټ، د پکتیکا ولایت له پوهنې ریاست سره په همغږۍ، د دغه ولایت د مرکز او ولسوالیو د ۱۱۳ بابه ښوونځیو د ښوونکو لپاره د هغوی د عملي وړتیاوو لوړنې په موخه یو میتودیک سیمینار جوړ کړ.
