د ولایتونو له پوهنې ریاستونو څخه لنډ خبرونه
ننګرهار
د ننګرهار ولایت پوهنې ریاست د ډله ییزې آزموینې په ترڅ کې، له ۵۸۰ تنو نوماندانو څخه رقابتي آزموینه واخیسته.
په پام کې ده، هغه کسان چې معیاري نمرې لاسه ته راوړي، د یاد ولایت په مدارسو کې به د ښوونکو په توګه وګمارل شي.
بامیان
د بامیانو ولایت مرکز اړوند یوه خصوصي ښوونځی د یاد ولایت له پوهنې له ریاست سره په همغږۍ، د ۱۶۰ تنو ښځینه زده کوونکو لپاره د قرآن کریم زده کړې کورس فعال کړ.
د مسئولينو دڅرګندونو له مخې: د یاد ښوونځي زده کوونکې به له شپږ مياشتنیو زده کړو وروسته فارغې شي.
غزني
مولوي بسم الله حمید د غزني ولايت د جاغوري ولسوالۍ د پوهنې د نوي آمر په توګه وټاکل شو او د یاد ولايت د پوهنې رياست د اداري آمر له لوري د يو لړ مراسمو په ترڅ کې خپلو همکارانو ته ور وپېژندل شو.
لغمان
د لغمان ولايت قرغه یي ولسوالۍ د پوهنې آمر، د ښوونځيو له ښوونکو سره مشورتي ناسته وکړه او د خپلو خبرو په ترڅ کې يې ښوونکي د ښوونيزو پروګرامونو او شرعي مسائلو پلي کولو ته وهڅول.
د يو بل خبر له مخې:
د لغمان ولایت الیشنګ ولسوالۍ د پوهنې آمر د یادې ولسوالۍ د ښوونځیو له ښوونکو سره د یوې غونډې په ترڅ کې، د لازمو ښوونیزو ستونزو د هواري ترڅنګ، د نوي تعلیمي کال د زده کوونکو د درسونو د چمتووالي په اړه له ګډون والو سره تفصیلي خبرې وکړې.
