د هېواد په لرو پرتو سیمو کې د ښوونکو د ګمارلو طرزالعمل په موخه د همغږۍغونډه جوره وشوه
د پوهنې وزارت د سرپرست وزير الحاج مولوي حبیب الله آغا په حکم د بشري سرچینو او پراختیا ریاست د لوی رئیس مفتي محمد یوسف ثاقب تر څارنې لاندې د لیرو پرتو سیمو د ښوونکو د ګمارلو په طرزالعمل کې د سمون په موخه یوه تخنیکي کمېټه وټاکل شوه. د دې تخنيکي کمېټې په غړو کې چې د پوهنې وزارت د ښوونې او روزنې د معينيت، مالي او حسابداري، تشکيلات او استخدام رياستونو استازي شامل دي، د هېواد په پرتو او محرومو سيمو کې د ښوونکو د استخدام په اداري طرزالعمل کې د اسانتيا رامنځته کولو په موخه ناسته وکړه.
غونډه د قرانکريم د مبارکو آیتونو په تلاوت سره پیل شوه، ورپسې د پوهنې وزارت د بشري سرچینو عمومي رئیس د هېواد پرتو او محرومو سیمو زده کوونکو ته د ښوونکو د ګمارلو پر اړتيا او ګټو د ټينګار ترڅنګ، په دې برخه کې د متوازنو ښوونیزو اسانتیاوو د برابرولو په لارو چارو هره اړخيزه وينا وکړه.
ورپسې د تخنيکي کمېټې غړو د يادې کړنلارې د لغتونو او محتوا د هرې کرښې په اړه تفصيلي خبرې وکړې.
د غونډې ګډونوالو د بحثونو پر مهال د کړنلارې په اړه خپل اصلاحي نظرونه څرګند کړل او پرېکړه وشوه، چې د کړنلارې د محتوا د لا بډاینې په موخه دې یادې غونډې د څو ورځو لپاره دوام وکړي، ترڅو په دې اړه هر اړخیز بحثونه ترسره شي او د پام وړ سمونې رامنځ ته شي.
