د هېواد شمالي ولایتونو ته د پوهنې وزارت د ښوونې او روزنې معين سفر
د پوهنې وزارت د ښوونې او روزنې معين الحاج مولوي سخاء الله سعید او ور سره مل پلاوي شمالي ولایتونو ته د ۱۴۰۲ کال ښوونیز وضعیت د ارزونې او عملیاتي پلانونو د تطبیق په موخه بلخ ولایت ته سفر وکړ.
پلاوی بلخ ولایت ته په رسېدو سره د دغه ولایت پوهنې رئیس الحاج مولوي عبدالجلیل شهید خېل لخوا له تود هرکلي سره مخامخ شو.
ورپسې ياد پلاوي د دغه ریاست له رئیس، آمرانو او مدیرانو سره په ناسته کې د پوهنې ریاست ټولې کړنې او د ياد ریاست عملیاتي پلانونو د تطبیق هر اړخیزه ارزونه وکړه او په دې اړه تفصيلي بحثونه وشول.
د بلخ ولایت پوهنې رئیس دغه ولایت ته د پوهنې وزارت رهبرۍ له پاملرنې څخه خوښي څرګنده کړه او ورغلي پلاوي ته یې د پلانونو او پرېکړو د عملي کولو ډاډ ورکړ.
ټاکل شوې چې دښوونې او روزنې معين د خپل سفر په دوام جوزجان، سرپل او فاریاب ولایتونو ته هم سفر وکړي تر څو د يادو ولايتونو د ښوونيز وضعيت اړوند لاندې مهم مسايل وارزوي:
۱- د ښوونیز او روزنیز وضعیت هر اړخیزه کتنه.
۲- د پوهنې ریاستونو بېلابېلو څانګو د ورځنیو پلانونو پر وخت تطبیق څخه څارنه.
۳- د مرکز او ولسوالیو پوهنې ریاستونو مسؤلینو لپاره د ښوونیزو ورکشاپونو تنظیمول.
٤- په محرومو او لرې پرتو سيمو کې د ښوونکو د ګمارنې له کړنلارې څخه څارنه.
