د هېواد د دارالمعلمینونو استادانو د پوهنې وزارت د سرچينو او اداري له معين سره وکتل
د پوهنې وزارت نوې تشکيلاتي طرحې د تطبيق له مخې د ياد وزارت له اداري چوکاټ څخه د ښوونکو د روزنې ولايتي څانګو د منحل کېدو پر بنسټ، د هېواد په کچه د ښوونکو د روزنې يو شمېر استادانو او کارکوونکو د دې وزارت د سرچينو او ادارې له معين، مولوي صبغت الله وصيل سره وکتل او د ياد وزارت په چوکاټ کې یې د دغې علمي ادارې د ساتنې او دوام غوښتنه وکړه.
فردين بهاوي د استادانو په استازيتوب، د ښوونکو روزنې رياست د پوهنې وزارت د کادرونو د ودې مرکز ګڼي او په خبره يې، د ياد وزارت له چوکاټ څخه د ښوونکو د څانګې جلا کېدل به په راتلونکي کې د مسلکي ښوونکو او نويو کادرونو د روزنې بهير له سستۍ سره مخامخ کړي.
نوموړي په داسې حال کې چې د ښوونکو او مامورينو د برخليک پر نشتوالي يې اندېښنه وښوده، د پوهنې وزارت له مشرتابه وغوښتل چې پر دې موضوع له سره غور وکړي.
ورپسې د پوهنې وزارت د سرچينو او ادارې معين مولوي صبغت الله وصيل، یو ځل بیا د دارالمعلمینونو له استادانو سره د یادې ادارې د منحل کېدو پر لاملونو او عواملو خبرې وکړې. نوموړي په دې اړه یوه څلور کسیزه کمېټه د دارالمعلمین له استادانو او د سرچينو او ادارې معينيت له مسئولینو څخه جوړه کړه، ترڅو په دې اړه د پوهنې وزارت له مشرتابه سره خبرې وکړي او لازم تصميمونه ونیسي.
