د هلمند ولایت په یو باب ښوونځي کې د یو محراب جومات بنسټ ډبره کېښودل شوه
د هلمند ولایت په بیتون عالي لېسه کې د ۳۰۰ زره افغانیو په لګښت د یو محراب جومات بنسټ ډبره، د یاد ولایت پوهنې مسئولینو، علماءکرامو او قومي مخورو په حضور کې د دغې لېسې د منسوبینو په همکارۍ کېښودل شوه.
په هغه غونډه کې چې په همدې موخه جوړه شوې وه، د هلمند ولايت پوهنې رئيس الحاج مولوي محمد عوض انصاري د دغه جومات پر جوړېدو د خوښۍ څرګندولو ترڅنګ، د يادې لېسې له منسوبینو څخه مننه وکړه او د دغه جومات جوړېدل یې د منسوبینو او زده کونکو لپاره د الهي فرمانونو پلي کولو برخه کې اړین وبلل.
د یادونې وړ ده، چې د همدغه جومات جوړېدو چارې په راتلونکو دریو میاشتو کې بشپړې او د لمونځ کوونکو لپاره ګټې اخیستنې ته چمتو شي.
