د ننګرهار له پوهنې ریاست څخه خبرونه
د ننګرهار د پوهنې رئیس مفتي حبیب حضرت حقاني د پوهنې په برخه کې له مرستندویو بنسټونو له مسوولینو سره په کتنه کې د ننګرهار له پوهنې سره د دوی د مرستو د مننې ترڅنګ له دوی وغوښتل چې د پوهنې د پرمختګ په برخه کې د دې ولایت د پوهنې ریاست سره مرستې وکړي.
د سویډن موسسې سیمه ییز دفتر د ننګرهار د پوهنې ریاست په مرسته د دغه ولایت په بهسودو ولسوالۍ کې د سیمه ییزو زده کړو ټولګیو ته د نویو ښوونکو د ګمارنې په موخه ازاده سیالي ترسره کړه، چې په دې ترڅ کې یې له ۷۰ تنو څخه ازموینه واخیسته. په دوی کې به درې تنه نارینه او شپږ تنه ښځینه د ښوونکو په توګه وګمارل شي.
د ننګرهار ولایت په بهسودو ولسوالۍ کې جک موسسې درې بابه ښوونځي جوړ او تر بشپړیدو وروسته ګټې اخیستنې ته وسپارل شو. د دغه ولايت د پوهنې مسوولين له جک موسسې څخه د مننې په ترڅ کې وايي: يادې موسسې د يادو دريو ښوونځيو په بیارغولو، د درسي ټولګيو، تشنابونو، د اوبو او بريښنا د سیستم په فعالولو څه باندې ٢٦،٥ ميليونه افغانۍ لګولي دي.
د پوهنې وزارت د مرکزي پلټنې ټیم ننګرهار ولایت ته د یوه کاري سفر په ترڅ کې د پوهنې ریاست له رئیس او نورو مسوولینو سره وکتل او د دغه ریاست فعالیتونه او کارونه یې وڅیړلې.
د ننګرهار د پوهنې رييس مفتي حبيب حضرت حقاني د دغه وزارت د پلټنې ټيم له څېړنو خوښي وښوده او څېړنې يې د ادارو او رياستونو د چارو په ښه والي کې اغېزمنې وبللې.
د ننګرهار ولايت د پوهنې رئيس مفتي حبيب حضرت حقاني د دغه ولايت په مرکز او ولسواليو کې د پوهنې ټولو ادارو ته لارښوونه کړې، چې د نوي کال او د پسرلي له رارسېدو څخه مخکې ښوونځي او نورې ښوونيزې ادارې د ميوه لرونکو او زينتي ونو په کرلو سره ښایسته کړي.
