د لوګر په آبچکان کلي کې ۶۰۰ زده کوونکو ته وړیا کورسونه جوړ شوي
د پوهنې وزارت ـ لوګر : ـ د لوګر ولایت مرکز پل علم پورې اړونده آبچکان سیمه کې ۶۰۰ زده کوونکو ته د بیلا بیلو مضمونونو د زده کړې کورسونه جوړ شوي دي.
دا کورسونه د مصطفی خېلو په نوم د یوه ښوونیز مرکز له خوا په سعودي عربستان کې مېشت د یادې سیمې د اوسېدونکو حاجي سید نبي احمدزي او حاجي سید احسان الله اتل او ځینو نورو کلیوالو په مالي مرسته فعال شوي دي ، په دغو جوړ شویو کورسونو کې زده کوونکو ته د دیني زده کړو او عصري زده کړو ترڅنګ د نصاب درسي کتابونه تدریس کېږي څو زده کوونکي د نوي ښوونیز کال لپاره پوره چمتوالی ولري.
د لوګرد پوهنې رئیس ښاغلی سرمؤلف سید عزیز احمد هاشمي د نوموړو کورسونو د جوړولو هرکلي کوي او د زده کوونکو د پوهې د کچې په لوړولو کې یې اغېزمن ګام بولي. د پوهنې رئیس د یادو کورسونو له مالي ملاتړ کوونکو او تنظیموونکو څخه مننه او قدرداني کوي اوپر نورو شتمنو لوګریانو غږ کوي، چې د ښوونځیو زده کوونکو ته ورته کورسونه په لاره واچوي.
د یادونې وړده، چې د لوګر د پوهنې ریاست په تېرو ژمیو کې هم د ښوونځیو زده کوونکو ته د یو شمېر شتمنو لوګریانو په مالي مرسته ورته کورسونه جوړ کړي دي.
