د لوګر د پوهنې ۳۰ کارکوونکو ته د بایومیټریک کارولو روزنه ورکول کېږي
د لوګر د پوهنې ریاست ۳۰ کارکوونکو ته د بایومیټریک سیسټم د زده کولو په موخه یو ورځنۍ روزنیز ورکشاپ پیل شو.
د نوموړي ورکشاپ د پیلېدو په غونډه کې د پوهنې رئیس عبدالوکیل کلیوال، تدریسي مرستیالې مینې سادات، د دارالمعلمین رئیس انجنیر محمد اکبرستانکزي، د اداري اصلاحاتو او ملکي خدمتونو د خپلواک کمېسیون آمر اجمل څاروان برخه لرله.
یاد ورکشاپ د اداري اصلاحاتو او ملکي خدمتونو د خپلواک کمېسیون له خوا پیل شوی، چې د نن ورځې تر پایه به دوام وکړي.
په دې ورکشاپ کې نوموړو کارکوونکو ته د بایومیټریک سیسټم د کارولو او د کارکوونکو د پېژندګلوي ډېټابیس جوړولو په برخه کې روزنه ورکول کېږي.
د یادو کارکوونکو تر روزنې وروسته به د لوګر د پوهنې ریاست د ټولو کارکوونکو او ښوونکو د بایومیټریک کولو پروسه رسمآ پیل شي.
د لوګر د پوهنې ریاست د خپل تشکیل له مخې ۴۴۷۵ کارکوونکي او ښوونکي لري، چې ۶۳۰ یې ښځینه کارکوونکې او ښوونکې دي.
