د فراه ولايت پوهنې رئیس د بالابلوک ولسوالۍ قومي مشرانو اوځوانانو لخوا وستایل شو
پوهنې وزارت، فراه: د فراه ولایت پوهنې رئیس استاد وحیدالله شيراني د بالابلوک ولسوالۍ له یو شمېر قومي مشرانو او ځوانانو سره په داسې حال کې لیدنه وکړ، چې د پوهنې ریاست مالي او اداري او د اسلامي تعليماتو مرستيالانو هم شتون درلود.
پیل کې د پوهنې رئیس د یادې ولسوالۍ د قومي مشرانو او ځوانانو له راتلو مننه او قدرداني وکړه، د ناستې په ترڅ کې راغلو قومي مشرانو د پوهنې رياست د نوې رهبرۍ کړنې وستايلې، ليرې پرتو سيمو او ولسواليو ته د پوره پاملرنې په پار يې مننه ترې وکړه او له پوهنې څخه يې خپل بشپړ اعلان کړ.
د یادې ولسوالۍ قومي مشرانو او ځوانانو د پوهنې په برخه کې خپلې یو شمېر ستونزې، غوښتنې او وړاندیزونه د پوهنې رئیس سره شریک کړې او هيله یې وښوده چې راتلونکی ښوونیز کال له تحرک او نویو لاسته راوړنو څخه ډک کال وي.
د پوهنې رئيس د نوموړې ولسوالۍ قومي مشرانو او ځوانانو سره ژمنه وکړه، چې د پوهنې په برخه کې د شته ستونزو د هواري لپاره به خپلو پراخو هلو ځلو ته دوام ورکوي، ترڅو د فراه په ليرې پرتو سيمو کې هغه ګلالي ماشومان چې له تعليم څخه محروم پاتې دي، هم زده کړې وکړي.
د یادونې وړده، چې د فراه د پوهنې رئیس له دې مخکې هم د ځینو نورو سیمو له دیني عالمانو، قومي مشرانو او ځوانانو سره د پوهنې بهير د لا چټکتیا او ټولنيز تحرک د رامينځته کولو په موخه لیده کاته کړي دي.
