د زده کوونکو د ترانو ويلو اړوند، د کابل ښار د پوهنې د رييس د مکتوب په هکله د پوهنې وزارت اعلامیه
د پوهنې وزارت رهبري په فرهنګي، هنري او ورزشي برنامو کې د ټولو نجونو او هلکانو زده کوونکو د ګډون حق ته ژمن دی. دغه وزارت دا هوډ نه لري، چې د زده کوونکو قانوني او تعلیمي حقوق محدود کړي.
هغه مکتوب چې په دې وروستیو کې د کابل ښار د پوهنې رييس لخوا صادر شوی، د پوهنې وزارت د موقف او پالیسۍ څرګندوی نه دی. د پوهنې وزارت د دغه موضوع څېړنه کوي او د پروسې تر بشپړې ارزونې وروسته به، پايلې له ګرانو هېوادوالو سره شریکې کړي. د اړتیا په صورت کې به د پوهنې وزارت انظباطي لارې چارې هم وکاروي.
د پوهنې وزارت په کلکه له هغه فعالیتونو ملاتړ کوي، چې زده کوونکو ته په ټولنیزو ډلو کې لکه د ترانې ویلو، څارندوی او ورزشي فعالیتونو لپاره دګډون فرصتونه رامنځته کوي. وزارت په دې برخه کې د ټولو زده کوونکو رضاکارانه ګډون هڅوي او له نصاب نه بهر برنامو کې يې پر ګډون ویاړي.
د دې تر څنګ دا د پوهنې وزارت دنده ده چې د ښوونځيو له مديريت څخه، چې د زده کوونکو داوطلبانه ګډون لپاره مسؤولیت لري، ډاډ تر لاسه کړي او مخکې له مخکې داسې اقدامات وکړي چې په ښوونځيو کې د هلکانو او نجونو له زده کوونکو د ناسمې ګټه اخیستنې خطرات را کم کړي.
د پوهنې وزارت د يوې عامه سکتوري ادارې په توګه، د ټول هېواد زده کوونکو ته د باکیفیته تعلیمي خدماتو وړاندې کولو ته دوام ورکوي او په دې تکل کې دی چې د ټولو هېوادوالو او بین المللي همکارانو ملاتړ په دې موخه ترلاسه کړي، چې زده کوونکي یو ډاډمن د زده کړې محیط ته لاسرسی ولري، تر څو زده کوونکي له خپلو ټولو وړتیاوو ګټه پورته کړای شي.
په پای کې د پوهنې وزارت له ټولو هېوادوالو هيله کوي، چې پر هغه معلوماتو اتکا وکړي چې د وزارت لخوا يې پخلی شوی وي او د پوښتنو په صورت کې له وزارت سره اړيکي ونیسي.
