د ترکیې هیواد د سرې میاشتې ټولنې له پوهنې وزارت سره د ماشومانو د لوبو د وسایلو مرسته وکړه
د ترکیې د سرې میاشتې ټولنې له پوهنې وزارت سره د زده کوونکو ماشومانو د لوبو د وسایلو مرسته وکړه. هغه مراسم چې په همدې مناسبت د پوهنې وزارت د غونډو په تالار کې جوړ شوي وو، پکې په افغانستان کې د ترکیې سفارت د تعلیمي چارو مشاور ښاغلي جنګیز، د ترکیې د معارف بنسټ مشاور ښاغلي خلیل الله رسولي، د ترکیې د معارف بنسټ د اداري چارو هماهنګ کوونکي ښاغلي مراد کوجي، د ترکیې د سرې میاشتې د ټولنې رئیس ښاغلي ادم کاراکایا، د ترکیې د سرې میاشتې د ټولنې کارمند ښاغلي ضیاء ، د ترکیې د معارف بنسټ غړي ښاغلي صهیب غفاري او د پوهنې وزارت په استازیتوب پکې د یاد وزارت د کیفیت د تضمین معینیت سرپرست معین او د دفتر عمومي رئیس محترم الحاج مولوي عبدالخالق صادق صاحب، د نړیوالو اړیکو او تمویل کوونکو رئیس محترم استاد وحیدالله هاشمي، دخدماتو رئیس محترم استاد حبیب الله خالد او د نشراتو او عامه اړیکو رئیس عزیزاحمد ریان برخه درلوده.
غونډه د خدماتو ریاست دکارکوونکي محترم قاري مجیب الله له لوري د قرآن عظیم الشان د څو مبارکو ایاتونو په تلاوت سره پیل شوه . وروسته د ترکیې سفارت تعلیمي مشاور ښاغلي جنګیز وینا وکړه او په خپله وینا کې یې وویل چې افغانستان او ترکیه یو د بل دوست هیوادونه دي او یو له بل سره زیات مشترکات لري. نوموړي زیاته کړه، چې د ترکیې هیواد په افغانستان کې د زده کوونکو د ظرفیت د لوړوالي په برخه کې کار کوي. د نوموړي په وینا، د لوبو وسایل مو ددې لپاره افغانستان ته راوړي دي، ترڅو افغان زده کوونکو ته یو سالم تفریحي چاپیریال برابر کړو.
وروسته د پوهنې وزارت د تضمین کیفیت سرپرست معین الحاج مولوي عبدالخالق صاحب وینا وکړه. نوموړي د خپلې وینا په ترڅ کې وویل، چې ترکیه د تاریخ په اوږدو کې د افغانستان یو دوست هیواد پاتې شویدی، دا چې دوی زمونږ له زده کوونکو سره مرستې کوي، مونږ یې تقدیراو مننه کوو. نوموړي زیاته کړه، چې د پوهنې وزارت د ترکیې دوست هیواد هر ډول مادي او معنوي مرستو ته د قدر په سترګه ګوري.
