د پوهنې وزارت د مرکزي رئیسانو او نیز مجلس دائر شو
د سه شنبې په ورځ (۲۹/۶/۱۴۴۳هـ ق-۱۲/۱۰/۱۴۰۰ هـ ش ) له غرمې وروسته د پوهنې وزارت د غونډو په تالار کې د یاد وزارت د سرپرست وزیر شیخ القرآن و الحدیث الحاج مولوي نورالله «منیر» صاحب په مشري د یاد وزارت د مرکزي رئیسانو اونیز مجلس دائر شو .
یاد مجلس چې د قرآن عظیم الشان د څو مبارکو آیاتونو په تلاوت سره پیل شو، د یاد وزارت په مرکزي رئیسانو برسیره معینانو هم پکې برخه درلوده او د ځینو مهمو موضوعاتو په اړه پکې مفصل بحثونه او پرېکړې وشوې .
په یاد مجلس کې پریکړه وشوه، چې کوم زده کوونکي چې له دولسم ټولګي څخه فارغېږي او بیا د شرعیاتو پوهنځي ته د کانکور ازموینې له لارې جذب کېږي، د هغوی علمي سویه ټیټه وي او د شرعیاتو پوهنځي د مضامینو علمي سطحه لوړه وي، نو ځکه د یادې پوهنځۍ زده کوونکي له زیاتو مشکلاتو سره مخ وي، ددې ستونزې د حل لپاره د یاد وزارت د ښوونې او روزنې معینیت د معین الحاج مولوي سخاء الله«سعید» صاحب په مشري یو هیئت وټاکل شو، ترڅو د لوړو زده کړو له وزارت سره په تفاهم او همږغي یادې ستونزې ته د حل یوه لاره پیدا کړای شي.
همدارنګه پریکړه وشوه چې د دیني مدارسو د نصاب د تجدید نظر لپاره دې داسلامي امارت له مقام څخه هدایت وغوښتل شي.
د دارالعلومونو د نصاب د کره کتنې لپاره د نصاب او مسلکي انکشاف لوی ریاست د رئیس الحاج مولوي عبدالحکیم همت اخندزاده صاحب په مشري یو هیئت وټاکل شو، ترڅو په یاد نصاب باندې کره کتنه ترسره کړي.
د یاد وزارت د سرچینو او ادارې معینیت ته دنده وسپارل شوه، ترڅو د ښوونځیو لپاره د کرایې په بدل کې د نیول شویو ښوونځیو د کرایې ستونزه حل کړي.
همدارنګه د سرچینو او ادارې معینیت د معین شیخ الحدیث والتفسیر مولوي سعیداحمد شهیدخیل صاحب تر مشري لاندې یو ځانګړی هیئت وټاکل شو، ترڅو د ریاست الوزراء دمحترم مقام له اداري مرستیال محترم مولوي عبدالسلام حنفي صاحب سره وګوري او د پوهنې وزارت د کارمندانو د امتیازي او NTA معاشاتو د سهمیې د لوړوالي په هکله ورسره خبرې وکړې .
برسیره پر دې د پوهنې وزارت د نصاب او خصوصي ښوونځیو ریاستونو ته دنده وسپارل شوه، ترڅو د ښوونځیو د د درسي پلان او تقویتي مضامینو لپاره یوه طرحه ترتیب او د وزارت محترم مقام ته یې وسپاري .
غونډه د دعائیې په لوستلو سره پای ته ورسیده .
ترتیب کوونکی: عزیزاحمد«ریان» د پوهنې وزارت د نشراتو او عامه اړیکو د ریاست رئیس .
